2020年3月28日 星期六

是時侯入市了嗎?

這幾天看着美股不停回升,心想不能錯過反彈的機會。於是就再短炒了一輪,連續做了相當多可以寫進教科書的高追低賣,結果就把前幾天賺的那一點點都回饋給市場先生。

最新的肺炎消息是英國首相感染肺炎,各國實施特殊措施去減少人群交流,連香港也禁止多人聚餐及命令部份行業休店。現在,是入市時機嗎?

多年前我就跟沒怎樣看股市的人說,當「股災」二字出現在報紙頭條,那便可以開始投入股市。本週初有朋友問MPF 的貨幣基金應否轉為股票基金是我也是這樣回答,說可以分十注,現在已經由底部回升10%,可以先入第一注啦。

這是給不會盯着股市看的人的建議,如果你真的能把資金投入去,然後關上報價app 不管世界發生什麼事的話就可以買。但如果你是會炒出炒入,而且會心情會受股價影響甚至是做槓桿的話,我不認為現在是重倉入市的時機。

1973年股災,恒指由1700 點跌至最低的150點。據報最多人輸錢並不是由1700 急跌那一段,反而由800點跌到400點的一段令不少人輸身家。

馬時亨:股災溫故知新 撈底或要等

我相信唯一不變的是人性,尤其是大量普通人的人性。跌市人踩人只影響到一小群本來已經持有大量投資的人,跌定,大家覺得估值夠低入市搏反彈才是最多人受傷的一段。雖然73年我未出生,但好歹也經歷過97/03,知道真正跌到底時,一般人是沒有興趣談股票的。

金融史上最貴的五個字就是「這次不一樣」。兩個月前我也認為現今科學先進,各國控制疫情應該有相當手段,反正香港已經有對付SARS 的經驗,這種明知的風險應該算是可控的吧? 結果就如大家所見,我算是付出不少的代價學懂我們並沒有學懂什麼。大家也不必神化大戶或投行,那些也都是人類,市況混亂時他們也只能被迫斬倉不問價沽貨。

做長線,你有巴菲特那種能力做價值投資當然好,但就連老巴也會等價格跌到價值以下才會出手。為什麼我們不能先離座冷靜一下,而要長期待在賭桌上呢? 長期下來,市場總會反映企業價值;而短線來說,市場只是反映其他投資者的心情。究竟我們在和秤重機還是投票箱打交道呢?

自己目前主要持有賣不掉的2-5年期企業債券 (買價50-70,我寧願賭公司不會倒債算了),股票只佔流動資產的15%。為免讓自己陷入再買再斬倉的風險,短期內還是不要做任何動作為妙。因為我發覺這星期自己有點急於趁升市追回損失,而這是典型的賭場輸家心態應該反省一下的。

我自己的MPF 在上週轉為90% 股票(港股/環球),10% 保守。就算自己看錯股市從此一飛沖天,至少也能說在MPF 上賺回一點吧?

還記得SARS 那一年嗎? 我預計未來香港就是這樣。目前各企業還在苦苦支撐,但終有一天會出現企業倒閉、失業率急升市民對未來沒有希望的日子。或許這樣說,你試試去尖沙嘴走一轉,你大概就能體會沒有遊客沒有下班人士的市況如何,也能看到不少店鋪已經捱不住要停業了。這些影響都未反映到今日的股市上,也有不少朋友等着撈底,如果這次和以前的股災一樣的話,最黑暗的時段還未出現呢。

當然,希望我猜錯。幾年後可以回來看這篇文來鞭自己的屍。

18 則留言:

  1. 望著垃圾債回升到80-90,好想入多D搏上返PAR。但又諗明明70任入無入,然後又驚洗多次倉。。。心情左搖右擺。。。

    回覆刪除
    回覆
    1. 我早前講果隻ENVA 由2x 升返上60 了(講緊買價),但正常黎講你唔會敢大注喺果個時候入的。

      左一把右一把係常態,最好係忘記一切,當無見過以前個價睇下而家呢個價仲值唔值得買咁呢。

      刪除
  2. 同意師兄所言,小弟唯一做的是按紀律分注
    以及不時檢閱持股公司質素如業務影響及負債

    回覆刪除
    回覆
    1. 我成日覺得控制到心理已經贏一半,一開始研究完落注,公司質素無變化就唔理股價就最理想呢。

      刪除
  3. MPF操作最簡單直接,預先做好PLANNING ,指數如到了一早設立的位置(每升趺10%),就買入/放出~橫掂MPF又唔可以即時取回消費,所以機械式操作最直接,不用煩

    回覆刪除
    回覆
    1. 係,MPF 係幾好的長期訓練,反正65/移民前你都只可以當係一個數字遊戲,無咁切身可以冷靜客觀咁睇呢。

      刪除
  4. 睇返你分享的ʻ馬時亨:股災溫故知新 撈底或要等ʻ先知當年真係好恐怖,想像唔到身歷其境會點⋯⋯

    回覆刪除
    回覆
    1. 當然,果時科技無咁先進,而股市又無而家咁成熟/多人參與,大市跌九成應該只係得一次唔會有第二次呢。

      刪除
    2. 你講得岩啊,2000電腦才開始普及,2000年之前既股市就好似大時代既畫面,資訊唔流通大家都係寫黑板架咋,今時今日我覺得跌五成都難,35%已經是極,再望下好多指標其實已進入極度恐慌和悲觀狀態,例如曾士通道

      刪除
    3. 另一方面,7x 年時的股市同一般人無乜關係,但今時今日散戶多左好多。好多國家直接間接迫人放錢落股市做退休規劃,連我呢啲二打六放1蚊入IB 都可以借2-3 蚊去炒。結果嘛,因為散戶多左所以更加恐慌了。

      呢個星期的波幅同spread 已經無上星期咁誇張,想搵啲斬倉清貨價都搵唔到了。如果無突發情況的確好似穩定左落黎,但睇外國的疫情越黎越嚴重,各國開始民間隔離,要好樂觀先敢認為情況會好轉而在呢個時候落注呢。

      刪除
    4. 我就唔係太理呢啲新聞,市場話俾我知,好消息唔一定升壞消息又唔一定跌,股神最近既訪問都講過市場好少受新聞影響,今次對佢黎講的確少見,當然無人會估到幾時見底,但同時亦無人知幾時會出現大反彈,我地只兩者取其輕,咁樣既跌市要十年先一次錯過左可能又唔知等幾耐。假如大市再跌其實簡單得多了,就係有資金就再入貨。

      刪除
  5. 311日本福島核電廠事故我都曾經以為會世界末日,當時忍痛斬了大部分持倉,但歷史話俾我知到底我有幾幼稚。

    回覆刪除
    回覆
    1. 如果唔係已經重倉,我諗我都可以shopping 得好爽。要換的已經換晒,可投資金額又得返最後一兩注所以只係等緊再換馬的機會。

      咁我都相信其實未到世界末日,如果有實力可以持貨唔受外界消息影響的話,三年後相信會有相當好的回報。但要做到呢步並唔係咁易呢...

      刪除
    2. 巴菲特講得無錯架,股市係活久見,當你係個市場耐左你就會知市場先生既脾氣,咩時候應該做D咩動作,老巴渣住1280億唔係傻的....

      刪除
    3. 好多人話巴菲特已經老左不復當年勇,過一排股災後又轉軚話佢幾神,諗返起其實幾好笑的...

      刪除
    4. 巴菲特神既地方唔係佢短炒叻...而係佢既耐性同紀律超符常人...

      刪除
  6. 同意師兄所說, 最差的還未來臨。 小弟都持有2~5年債券, 跌到>30%絕不少, 但拿股票比起來, 債券是買公司不會倒/及有能力還款, 股票是擁有公司, 以還款次序來說, 債券比股票應該還要前, 理應比起股票安全, 所以也不明白為何今次債券也會跌到人心惶惶。

    回覆刪除
    回覆
    1. 果幾日,我見AAA 4.x% 的債券成交價到可以跌到去92 (WFC)。主要係去槓桿加上短乏流動性造成的急跌,然後就係邊隻仲有價就賣邊隻去套現。如果無槓桿,唔駛焗賣的話只係睇戲唔會重傷呢。

      連橋水用股債金幣品做的風險平衡組合都PK,我地呢啲平民只要有落場好難唔中招呢..

      刪除