在美股第四次熔斷的這天，這隻優先股突然大跌四成現報10.4。雖然我只有少少500股，但也應該花點時間再看一下這家公司的情況，看看是否應該不問價清倉。
RILYG 的發行商是B. Riley Financial Inc.(RILY)，是一家表現挺亮麗的金融機構，2019 的淨收入為2018年的5倍 (81.3M vs 15.5M)，再看資產負債表，這公司還是淨現金公司，於去年第四季，該公司手持淨現金39.2M(連結)。此外，該公司剛在二月發行了另一支總值132.25M 的優先股(RILYM)。這樣看來這家公司的現金流應該不會有什麼問題。
判斷現金流沒什麼問題的另一項資料是該公司就在本週二(17/3)公佈了一項收購醫療通訊的公司SPOK 的計劃，RILY 提議以$12(39%的溢價)收購SPOK，該計劃約值 230M美元。在美股不停熔斷的時刻公佈這項收購計劃，可以想像一來是因為RILY 本身財政穩健，二來他們預計在疫情下醫療相關公司可受惠於政策，也可能認為是SPOK 的資料能提升協同效應帶來進一步的商機。
RILYG 發行了兩年多，絕大部份時間都在$25 上下算是非常穩定的一支優先股。但就像在第一次熔斷後我們所知道的，現在這市況下，投資者基本上是不問價沽貨。例如今晚我在50的價位掛了一點債券的買盤(Enova)，竟然在這個價位也有3K成交。在我取消買盤後，IB 就只餘下賣盤沒人再出價了。
因為注碼控制的關係，雖然看來這價位相當超值，但我還是不會再加碼於單一優先股。花這點時間只為增強自己持股的信心而已。前述的買入債券有點像試盤，我本來不太相信這種價格也有人會賣，所以成交了一點就取消買盤了。正如前文所述，我希望自己以後的加碼是買上不買落呢。
當然，也是這句：上述內容為個人意見，並不構成任何投資意見，本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前，投資者應考慮產品的特點、其本身的投資目標、可承受的風險程度及其他因素，並適當地尋求獨立的財務及專業意見。
Yan兄你好，我完全明白啲人亂放嘅心情，因為我都係走唔甩，心情好亂好怕自己捱唔住，手上點賣都賣唔出有三隻，可以麻煩yan兄幫忙睇下嗎？Glop prb, atco prg/pri, f prb
回覆刪除頭兩隻得返幾蚊，連ford都係得返$11，我其實第一次投資，現已虧損幾十萬，晚晚都訓唔著好怕自己捱唔住⋯
我唔敢話有乜意見，只係因為我輸到傻左所以仲未走呢。手上持有果D，而家的動作主要都係睇下基本財政狀態同亂估今次災情對間公司影響有幾大。
刪除GLOP 同 SSW (ATCO)系列我都有，都係第一次熔斷時要平槓桿所以不問價清晒。近來當然都仲有望住個價，睇住佢日日跌完全體會到你的苦惱呢。
雖然Ford 好有名，侵侵又好似想將汽車行業搬返美國令佢great again。但唔好太相信有任何公司係大得不能倒。睇財報雖然只係望倒後鏡，但起碼令你知道唔係走緊下坡，更重要係令你有個理由去持貨。始終，我地一般對公司運作都好陌生，如果只係「信」的話其實好難說服自己去持貨呢。
而家雖然已經太遲，但你試下幻想自己呢舊錢如果無晒會點吖。以我自己為例，大概八成流動資產放喺IB，呢部份在過去一個月蒸發左四成(主要係上星期...)。然後諗一諗，就算某一日所有投資物跌到零，咁死唔死得去呢? 係痛苦啲，但起碼唔會影響到短期的生活。
我明你而家會好亂，甚至走黎問個輸家(i.e., 我)意見。我只可以分享自己的體會：錢財只係身外物，無左再搵過就可以。如果你到此時此刻仲有槓桿的話就清左佢，清啲跌得無咁多的(成個市場都咁做緊)，撥錢落去放喺度，或者真係不問價清貨。
我自己的話就覺得跌到$10，再清貨已經無乜意義(反正持貨不多，換算只值四萬港元也不是輸不起的錢)，但呢點真係好個人我唔敢俾意見你呢。
頂住，錢財只係身外物，最多再打幾年工唔會死的!
多謝yan兄，憺小的我沒開槓桿，但是全副身家。
刪除所以第一次溶斷沒有做任何動作（以為好彩唔使迫放，怎料現價⋯⋯）
我都明白得返幾蚊不如博以後反彈嘅道理，我三隻賣唔出的餘下約1500股，幾個月前三十萬買返黎，到賣出果下應該唔夠十萬，好似真係好值博⋯理性一直都咁講。
我個人環境是做小生意多年，投資金額是多年近全部所得。但由上年六月開始月月都虧蝕租金同燈油火蠟，到今年一月起更接近零生意，好唔捨檔野，但睇黎都無得簡。
無打工近十年八年，而家失業率提升，諗起真係唔到我唔灰了
我家也有人開檔做生意，仲係重災區的酒吧同火鍋。前排行過見到星期日鋪面都無乜人，見到面時我都唔敢問佢生意點呢。
刪除政府果少少資助申請下，反正申請唔太需要成本，幫補下好過無。
做生意我真係唔識，你做左咁多年總會有啲心得同體會。而家摺左檔嘢佢，第日仲可唔可以東山再起? 既然你賺左咁多年應該算做得唔錯，係咪只係因為社會環境，啲人唔出街所以令你近乎零生意? 啲人係幫趁你的手藝/服務，定係因為習慣所以去你間鋪?
做生意一定係有賺有蝕，無人知今次的情況會維持幾耐。相比起股債投資，其實呢方面先係你最應該考慮清楚的。
呢啲時候啲心靈雞湯都有啲用的。你睇下肯德基，都係六張嘢返鄉下後先做起KFC，只要仲懷有希望，無乜嘢係解決唔到的呢!
多謝yan兄，有時將件事寫出黎對個人整理思緒都有用。二月尾跌第一個十萬時我仲掉以輕心，沒有正視，沒有坐低將件事整理出嚟諗下一步，身邊又無人投資我呢類etd同債，無人可傾，逃避了事。而家諗返後悔都無用，但不禁痛心。
刪除我檔野唔係政府資助範圍，本來都諗住用積蓄頂落去，畢竟我真係好鍾意，做得好開心。
小妹眼淺，諗起又想喊了
呢度好多人同你一樣，我都係二月中招但仲以為只係地區病，點知兩三個星期就變成世界話題。二月中我個profile 仲係新高，由最高位計，我個profile 在最近一個月差唔多無左50%呢。
刪除同熟朋友講有關錢的話題總好似怪怪咁，所以都係輕輕講過下。有人問我都係果句「差唔多輸死，不過死唔去咪同佢鬥長命囉...」咁。無論呢度定你自己果邊，如果講(寫)左出黎令自己感覺好啲可以整理下思路咁都係一個方法呢!
真係好感謝yan兄同我分享，其實大半年前我真係不太留意經濟事，係實戰之後再惡補。最熟朋友同我一樣都係從不投資，自己屈埋望住個市跳樓咁跌，感覺真係唔識形容。
刪除其實我都認同長揸嘅道理，但到實戰起黎估唔到自己咁難受，好在講左出嚟之後得到大家提點，感覺真係好左好多，好多謝你
師兄可以幫下眼嗎？https://mywaytoh.blogspot.com/2020/03/blog-post.html?m=1
回覆刪除今次股災唯一令小弟想不通的是為何優先會暴跌。
回覆刪除因為有人好想放，所以接貨者愈用底價接⋯⋯⋯同幾日前比跌了75%⋯⋯好難接受
刪除睇返以前啲歷史，經濟好時優先股唔會大升，但股災時佢同股票個跌幅係一樣的。好消息係多數情況下優先股在股災後都會表現得比較好，但唔知這次是否不一樣了。
刪除大部份優先股的成交額都比較細。風平浪靜時都仲有人為左收息買優先股，大上大落時啲人寧願買正股搏反彈都唔會入呢啲上升幅度有限的東西。結果嘛，就變成一大堆人想賣(例如我要平槓桿)，但無乜人買，多人賣少人買咁唔駛理基本面都會急跌呢...
如果我唔係成手貨我都會考慮呢個時候用半價甚至三四折去買優先股/債，只可以話自己明明話而家係高位，但都繼續滿倉實在太唔識風險管理呢。
我就係見多年來大致幅幅上落，誤以為是穩定投資⋯⋯
刪除你分析得對，後悔自己已成事實先知道這道理